Rais wa Jamhuri ya Muungano wa Tanzania, Dk. Samia Suluhu Hassan, anatarajiwa kuwa mgeni rasmi na kufungua Mkutano wa 153 wa Umoja wa Mabunge Duniani (IPU), unaotarajiwa kufanyika jijini Arusha kuanzia Oktoba 5 hadi 9, 2026.
Hayo yamesemwa leo jijini Arusha na Spika wa Bunge la Tanzania, Mussa Zungu, wakati akizungumza na waandishi wa habari kuhusu maandalizi ya mkutano huo.
Zungu amesema zaidi ya wajumbe 2,200 kutoka mataifa 183 wanatarajiwa kushiriki mkutano huo, ambao utafanyika kwa mara ya kwanza nchini Tanzania.
Amesema idadi hiyo inatarajiwa kuifanya Arusha kuwa mwenyeji wa mkutano mkubwa wa kimataifa utakaowakutanisha wabunge na viongozi wa mabunge kutoka sehemu mbalimbali duniani kwa ajili ya kujadili masuala yanayogusa maendeleo na mustakabali wa jamii.
Utawala Bora, Amani Kupewa Kipaumbele
Kwa mujibu wa Spika Zungu, kaulimbiu ya mkutano huo inalenga kuimarisha utawala bora na kuiwezesha jamii kupitia ushirikishwaji, imani na fursa kwa wote.
Amesema pamoja na kaulimbiu hiyo, mkutano huo utajadili masuala mbalimbali ya kimataifa, yakiwemo utawala wa kidemokrasia, amani na usalama, mabadiliko ya tabianchi, haki za wanawake pamoja na masuala yanayohusu vijana.
Amesema ajira kwa vijana na namna ya kuongeza fursa za kiuchumi kwa kundi hilo pia zitakuwa miongoni mwa ajenda zitakazojadiliwa na wajumbe.
Mkutano huo unatarajiwa kuwa jukwaa la wabunge kutoka mataifa mbalimbali kubadilishana uzoefu na kujadili changamoto za kimataifa, pamoja na kutafuta suluhisho kupitia ushirikiano wa mabunge.
Tulia Ackson Kumaliza Uongozi IPU
Aidha, Zungu amesema Rais wa IPU, Tulia Ackson, ambaye pia ni Mbunge wa Bunge la Tanzania, atamaliza muda wake wa uongozi katika kipindi cha mkutano huo.
Mkutano huo wa 153 wa IPU unatarajiwa kuwa tukio muhimu kwa Tanzania kutokana na nafasi ya nchi kuwa mwenyeji wa viongozi na wajumbe kutoka mataifa zaidi ya 180, huku Arusha ikiwa kitovu cha majadiliano kuhusu masuala ya utawala, amani, maendeleo na fursa kwa jamii.
