Tanzania na Burundi zimejadiliana na Benki ya Dunia kuhusu kuharakisha utekelezaji wa mradi wa Ushoroba wa Kati (Central Corridor), unaolenga kuunganisha miundombinu ya usafirishaji na shughuli za kiuchumi ili kukuza biashara, uwekezaji na ajira katika ukanda huo.
Majadiliano hayo yamehusisha Waziri wa Fedha wa Tanzania, Balozi Khamis Mussa Omar, Waziri wa Fedha wa Burundi, Dk. Alain Ndikumana, na ujumbe wa Benki ya Dunia ukiongozwa na Makamu wa Rais anayesimamia Kanda ya Afrika Mashariki na Kusini, Dk. Ndiame Diop.
Akizungumza katika mkutano huo, Omar amesema lengo ni kuubadilisha Ushoroba wa Kati kutoka njia ya usafirishaji na kuwa eneo jumuishi la kiuchumi, kwa kuunganisha reli ya kisasa (SGR), bandari ya Dar es Salaam na uwekezaji katika kilimo, madini na viwanda.
Amesema ujenzi wa SGR unaendelea kwa awamu mbalimbali, huku sehemu zinazounganisha Dar es Salaam na Dodoma zikiwa zimeanza kutoa huduma. Kazi zinaendelea katika sehemu nyingine zinazolenga kupanua mtandao wa reli kuelekea Tabora, Mwanza na Kigoma, karibu na mpaka wa Burundi.
Ameeleza kuwa ili mradi huo uwe na tija, reli inapaswa kuunganishwa na mtandao wa barabara, vituo vya huduma za usafirishaji na mifumo ya ugavi. Amesema ushirikiano kati ya Tanzania, Burundi, Jamhuri ya Kidemokrasia ya Kongo (DRC), Benki ya Dunia na washirika wengine wa maendeleo ni muhimu katika kufanikisha azma hiyo.
Omar amesema lengo si kuondoa matumizi ya malori na kutegemea reli pekee, bali kujenga mfumo jumuishi ambao malori yataendelea kusafirisha mizigo kwenda kwenye vituo vya reli, hivyo kuongeza ufanisi na uwezo wa miundombinu kuvutia uwekezaji.
Kwa upande wake, Waziri wa Fedha wa Burundi, Dk. Ndikumana, amesema mradi huo utasaidia kuboresha sekta ya kilimo na kurahisisha usafirishaji wa bidhaa zinazopita nchini humo kwenda masoko ya kikanda na kimataifa.
Amesema kuimarishwa kwa kiungo cha reli kuna umuhimu wa kimkakati kwa maendeleo ya shughuli za uchimbaji wa madini ya nikeli na kobalti katika eneo la Musongati nchini Burundi. Akizungumzia ukubwa wa rasilimali hizo, ametaja makadirio ya tani milioni 150 hadi 230 zinazohusishwa na uzalishaji unaotarajiwa, akisisitiza umuhimu wa miundombinu ya usafirishaji katika kufikia masoko ya kimataifa.
Naye Diop amesema Ushoroba wa Kati ni muhimu katika kukuza biashara na ustawi wa wananchi katika ukanda huo, akieleza kuwa Benki ya Dunia iko tayari kuunga mkono juhudi za kuutekeleza.
Amesema Benki ya Dunia na washirika wa kikanda wanatarajia kufanya tathmini ya sekta binafsi ili kubaini fursa za uwekezaji na kuhakikisha miundombinu ya reli inaendana na mahitaji halisi ya shughuli za kiuchumi katika ukanda huo.
Kwa ujumla, Ushoroba wa Kati unalenga kuunganisha bandari ya Dar es Salaam na maeneo ya ndani ya Afrika, kurahisisha usafirishaji wa bidhaa, kupanua masoko, kuvutia uwekezaji na kuongeza fursa za ajira. Utekelezaji wake unategemea uratibu wa miundombinu na ushirikiano wa nchi zinazohusika pamoja na washirika wa maendeleo.
